Magway City – မကွေးမြို့
မကွေးမြို့တော်သည် မြန်မာပြည်အလည်ပိုင်းတွင် ရှေးအစဥ်အဆက် ကတည်းက တည်ရှိသော မြို့တော်ဖြစ်သည်။ ဆီထွက်သီးနှံပေါများ၍ မြန်မာပြည်၏ ဆီအိုးကြီးဟုထင်ရှားသည်။ အချက်အခြာကျ၍ မြန်မာနိုင်ငံ အလယ်ပိုင်း၏ တက္ကသိုလ်မြို့တော် ဖြစ်လာသည်။ မကွေးမြို့တော်၏ ပြောင်းလဲလာသော ပုံရိပ်များကို ထင်ဟပ်စေသည့် လူထုအမှတ်သညာပွဲတော်ကို ၂၀၁၈ ခုနှစ်တွင် ကျင်းပခဲ့ပါသည်။
လူထုအမှတ်သညာပွဲတော်
လူထုအမှတ်သညာပွဲတော်သည် ဒေသတွင်း လူမှုအဖွဲ့အစည်းတစ်ခုပြောင်းလဲလာပုံကို လူထုကြားက သမိုင်းအဖြစ် ချဉ်းကပ်လေ့လာကာ ဓာတ်ပုံမှတ်တမ်းများ အနုပညာပစ္စည်းများဖြင့် ပြပွဲအဖြစ် ခင်းကျင်းပြသရန် ရည်ရွယ်ခြင်းဖြစ်ပါသည်။ ထိုပြပွဲများမှတဆင့် မတူညီသောမျိုးဆက်များက မိမိဒေသပြောင်းလဲဖြစ်ထွန်းလာမှုများကို အတူတကွ လေ့လာကြည့်ရှုရန်ဖြစ်ပါသည်။
ဓါတ်ပုံ၊ ပန်းချီ၊ မော်ကွန်း ဗီဒီယို၊ ကဗျာ၊ စာပေတို့ဖြင့်ပေါင်းစပ်ခင်းကျင်းကာ လူကြီးလူငယ်မျိုးဆက်တို့ကြားမှ ကွာဟချက်များကို နားလည်တက်စေရန် မတူညီသော အဖွဲ့အစည်းများ ပေါင်းစပ်ထားသောလူမှုအဖွဲ့အစည်းဖြစ်ကြောင်း ခံစားတတ်စေရန် စေ့စပ်စာနာတတ်သော မျက်လုံးများဖြင့် လူမှုဘဝတို့ကို ကြည့်မြင်စေရန် ခင်းကျင်းသော အနုပညာနှင့် အမှတ်သညာပွဲတော်ဖြစ်ပါသည်။
“ကျွန်တော်တို့ဟာ
သမိုင်းကိုမျက်နှာချင်းမဆိုင်ရဲ
ရှောင်လွှဲဖုံးကွယ်နေလို့မရပါဘူး
သမိုင်းရဲ့သင်ခန်းစာကို
ယာညက်သလိုကြေညက်မှ
အနာဂါတ်ခရီးကို
ဖြောင့်ဖြောင့်သွားလို့ရပါမယ်
ဒါကြောင့်အတိတ်သမိုင်းဆိုတာ
အနာဂတ်ကိုသွားရာ
အဝင်တံခါးဝဖြစ်တယ်လို့ယုံကြည်ပါတယ်
ဒါကြောင့်ကျွန်တော့်ရဲ့
Open History Project
လူထုအမှတ်သညာပွဲတော်ကို
ကျင်းပပြုလုပ်ခြင်းဖြစ်ပါတယ်“
လူထုအမှတ်သညာပွဲတော် (မကွေးမြို့)
လူထုအမှတ်သညာပွဲတော် (မကွေးမြို့) တွင်ပြသ ရန် ဓာတ်ပုံများအား အမျိုးအစား (၃) မျိုးခွဲ၍
–People – လူပုဂ္ဂိုလ်များ
(လူကို အဓိကထား၍ ရိုက်ကူးထားသောပုံ)
–Cityscapes – မြို့ပြ၀န်းကျင်များ
(ရှုမြင်ကွင်းကို အဓိကထား၍ ရိုက်ကူးထားသောပုံ)
–Documents – မှတ်တမ်းမှတ်ရာများ
(ပို့စ်ကတ်ပုံ) ကို ပြသထားမည်သည်။
